الاثنين، سبتمبر 20، 2010

معتقل المغول (مبنى الجرافيك)

كنت حكيت ليكوا عن المطبعه وهي غرفة التعذيب الاساسيه في المعتقل.دلوقت هعرفكوا بباقي الزنازين اأأاقصد (الاتيليهات)
المبني عباره عن تلات ادوار كل دور فيه اتيليه وطبعا الاتيليه اللى في الدورالتالت: هو الجحيم بعينه .من اول ارتفاع السلالم .والكأبه اللي فيه ..الشمس خابطه في طول النهار ولا كأننا علي خط الاستواء ده للي بيفهم في الجغرافيا .وكان الجو فيه نار .حاجه كده تشجع على الشغل .وانت فوق محدش بيسأل فيك ولا يعبرك .ودي حاجه تانيه تظبت المود .الارض بلاط من نوع الموزاييك بتاع زمان .مهما تحاول تعرف لونه مش هتقدر .اصل الارض ما اتمسحتش من قرون.والحيطان لونها رمادي موقعه باقلام رصاص من نوع (فبر كاسل )باسم الضحايا من الفنانين امثالي وعليها بصمات الايادي ملطشه باحبر الشيني من نوع (روترنج)و لطشات فنيه من فرشه (رفايل)بوزها معوج من الاضطهاد الفني
الكراسي من الخشب المسوس والمحفور عليه بالكتر انتقاما من الاشياء اللي بنرسمها.من اول الطبيعه الصامته من تماثيل وقماش وكل انواع الجماد الصامت .للكائنات الحيه الشريره المتخفيه تحت اسم الموديلز.
مكنش في استندات في الاتيليهات .كنت بجيب كرسي واسند الشاسيه على ضهره لغاية ماجالي انبعاج في العمود الفقري(شايست يعني)ومفيش ستاير على الشبابيك علشان نبقي شيش بيش ويحولونا على التأهيل المهني .كان  في اخر الزنزانه اوضه متطرفه عباره عن جحر يسمي البوفيه وكان عم سامي هو (الاتيليه بوي ) زي الاوفيس بوي كده .وكان متخصص في عمل (الفارسكور)يعني الينسون باللبن للمابيقعدوش على القهاوي.وكمان الشاي البوسته.والله زمان كنت بحب الفارسكور ده اوي.
كنت لما اقعد في الاتيليه ده كنت بحس بالقهر في نفس الوقت بيتملكني غباء مالهوش حل وحاله من الخرس المؤقت .ومع نهاية المشروع يجيلي حالة بارانويا حاده .مع غسيل مخ من التعذيب.
الدور التاني:
ما يتخيرش عن التالت من حيث المواصفات القياسيه.لوشافه اي مهندس انشائي من اللي بنوا سجن طره هيقول عليه تمام التمام.
وده يهيئك نفسيا للحفر البارز.
ابلاكاش فنلندي واسبيد بول:
ادوات حفر الخشب .دي ماده من المواد اللي بندرسها .ولازم يكون ليها عده زي النجارين كده .تتكون من :
خشب ابلاكاش فنلندي لزوم الحفر عليه
صنفره خشابي و كمان مبرد خشابي
حبر شيني اسود ومنيل على دمغنا وحبر كينو اسود وكمان الوان.الحبر الكينو ده رحته عامله زي بلاعات الصرف الصحي
سلاح ابيض (اسبيد بول و كتر)ده للحفر
مش بس كده ده في عدد كتييير .
كان عندنا دكتور بيدرس لينا مادة الحفروكان بيطلع عين الدفعه من اول رسم الاسكيز والمعاناه اللي كنا بنعانيها من كلامه  من اول قولتلك عيد ..طب عيد لغاية روح يا بابا شفلك كليه تانيه غير هنا.لغاية درجات المشاريع المهببه اللي كان بيديهلنا في التحكيم ولا نافع معاه مدرسه تعبيريه ولا حتي تأثيريه ده حتي لو كنت (رامبرنت) نفسه برضه هيقولك روح يا بابا من هنا ..بس منكرش انه هو اللي خلاني حفارة جرافيك.
فاكرين الرولة وتحبير الاكلشيه وورق الجرايد ونطبع وتطلع الطبعه مهزوزه ويجلنا فذع انساني كل مره..ايااام ما تتنسيش
الدور الاول :
المشهد نهار داخلي .ستاير سودا .دكتور قاعد جوه .فنانين قاعدين يرسموا .يسود الصمت المكان الا من اصوات الريشه وهي بتخربش علي الورق الكانسون .اضاءه نيون زي بتاعة الحمامات تعملك حول في عنيك الاتنين وتقريبا تؤدي الي العمي المؤقت.
الاتيليه ده كان منظور من اللي رايح واللي جاي علشان جنب اوضة الدكاتره.
على فكره انا مكنتش بقعد في الاتيليه كنت بقعد في الطرقه اللي قدامه على السلم اصل الريحه جوه كانت مش ولابد يعني
وده هو بختصار المبني الازلي المسمي بمعتقل المغول.
المره الجايه مناظر
قصه ولا مناظر!!!!!!!

الجمعة، سبتمبر 17، 2010

سلندر ولباده وقلافونيه....

اللباده والسلندر والقلافونيه:ادوات التعذيب بتاعة مبني الجرافيك
ده المبني اللي بنتمي اليه .اه  ايوه انا كنت تخصص جرافيك وقعدت اربع سنين في معتقل المغول ده .مبني تحس فيه بالخنقه اول ما تدخله .اففففف ريحته غريبه لاء وضلمه له بوابه حديد من ايام سجن القلعه اللي كان محبوس فيه الشيخ امام و احمد فؤاد نجم.عارفين الاغنيه بتاعة سجن القلعه دي كانت النشيد الوطني بتاع الجرافيكيين (الحفارين)
اتجمعوا العشاق في سجن القلعه...اتجمعوا العشاق في باب الخلق وطبعا السجن لازم يكون ليه سجان والسجان ده كان (بدران بتاع معتقل المغول)اللي هو ميييين يا تري؟؟؟؟
وفاء وفاء وفاء
شايفين صورتها ناقص تمسك كلابشات في ايديها بس واضح انها كلبشت بيها المذكور عبد الغني.
نرجع للمبنى تاني كنت بكلمكوا عن الريحه  ودي خارجه من المطبعه يا عيني على المطبعه..تقع في الدور الارضي  الشبابيك زي شبابيك الزنازين عاليه وعليها قضبان حديد .كنت في الاول مش عارفه ليه بس بعد كده عرفت ..علشان محدش يبص على اللي بيحصل جوه.اصلها كانت اشغال شاقه
لما ندخل المطبعه كان لازم يكون لينا طقوس معينه ..اولا لازم تنعزل وجدانيا عن العالم اللي بره ..ثانيا :استعد نفسيا للمرمطه . ثالثا و ده الاهم يكون معاك العده.
العده عباره عن ايه: لوح من معدن الزنك ..ده لزوم الحفر
سنبك وابره  و ده لزوم الغز في بعض  وده برضه لزوم الحفر
علبة حبر اسود ومنيل من نوع (انجل) لازم تكون ريحته وحشه علشان نرجع
اسكويش وده لزوم التلييس قصدي التحبير
شاش منشي محدش يسالني منشي ليه  وده لزوم التلميع
قلافونيه مدقوقه علشان تسد الرئتيين ومعرفش اشرب شيشه تاني
كوكتيل من حمض النيتريك المركز علشان اولع في نفسي انا والدفعه..وكمان بعض الرفايع لزوم التكنيكات
اخيرا وليس اخرا (السلندر )واللباده المعفنه.دول كانوا القطع الاساسيه في المطبعه (زي ما هو الحمام اساسي في كل بيت)
كان السلندر هو وسيلة الطباعه الوحيده  وكان في سلندرين بس لو اي حد من بتوع حقوق الانسان كان شافنا كنا هنصعب عليه
واقفيين بالدور زي الطوابير بتاعة انابيب البوتاجاز.واللباده تتزحلق وتكلكع فوق الطبعه وتطلع النتيجه هباب في هباب..ونعيد الكره تاني لحد ما يطلع عين اللي جابونا مش بقولكوا دي الات التعذيب.
ده هو الدور الارضي بس من معتقل المغول ...والبقيه تاتي

الخميس، سبتمبر 16، 2010

موديلز.موديلز.موديلزززز...

مش عارفه اقولكوا ايه... اصلها حاجه تكسف اوي
اصلي اول ما دخلت الكبسوله (الكليه) كنت فاكره ان المودليز  حاجه كده تسر القلب والعين بس المصيبه كانت اكبر من كده .كانت مفاجأه .ان ان ان.(موسيقي تصويريه|)ده بس علشان الموود ويحصلكوا معايشه من هول المفاجأه.
اصلي مكسوفه احكي...المهم طبعا كلكوا عارفين اننا في الكليه بنرسم موديلز ودي ماده مستقله لوحدها .لما دخلنا الاتيليه بدأت اعرف التيته كلها .كانت فيه طقوس الاول و هي عباره عن دفعى المعلوم للاشياء العجيبه اللي هرسمها  واختار ارسم مين من التحف الاثريه حاجه كده من مخلفات العصر الحجري منذ بدأ الخليقه .قعدت و استعديت للرسم ...بصيت في وش الكاينه اللي قدامي ....يععععع حاجه تغم النفس ..لقيت بني ادم مش عارفه نوعه ايه .حاجه كده مشلفطه زي المتسولين بتوع شارع جامعة الدول العربيه.عارفين  المتسولين كل واحد منهم ليه منطقه
سيده .
و دي كانت منطقة (سيده)الموديل اللي حظي الاسود وقع فيها .قعدت وسلمت امري لله وبدات ارسم الاوت لاين وعينكو ما تشوف الا النور قعدت تتلولو وتزعق فينا  وتقول يلا بسرعه انا زهقت وتنفخ في وشنا .سلمت امري لله ورحت اشوف حاجه تانيه ارسمها وكانت الحاله التانيه حاجه كده اسمها ام ايمان
ام ايمان ...يالهوي 
مصيبه من مصايب الزمن وشها من كتر التجاعيد عامل زي خريطة المناطق العشوائيه.ولابسه جلابيه زرقه مابتغيرهاش يعني ولا مره في الخمس سنين غيرتها ..تخيلو الريحه تكون عامله ازاي..
ام صلاح ...ازيك يا غالي
دي جملتها المشهوره اول ما تشوف اي حد من سكان الكبسوله.ماسكه على طول جردل في ايديها ولا (هنومه في فيلم باب الحديد)لغاية النهارده نفسي اعرف ايه اللي جوه الجردل ده.
تخيلوا موديلز بالشكل ده درجات المشاريع هتكون ايه...
وادي ماده من عندنا كانت تعتبر من ادوات التعذيب للفنانين امثالنا
علي فكره في ادوات تعذيب تانيه غير الموديلز زي السلندر واللبادة
السلندر واللباده و القلافونيه!!!!!